ஜி.எஸ்.டி: உண்மை என்ன?

ஜி.எஸ்.டி. வரி விகித நிர்ணயக் கூட்டத்தில் தங்கம் மீதான வரி விகிதம் முடிவானதும், “ஜிஎஸ்டி வரியால் நாடு முழுவதும் தங்கம் விலை அதிகரிக்கும்’ என்று பிரபல ஆங்கில நாளிதழ் தலைப்புச் செய்தி வெளியிட்டது.
அதே நாள், “ஜிஎஸ்டி நடைமுறைக்கு வந்தால் கேரளத்தில் தங்கம் விலை குறையும்’ என்று அந்த மாநிலத்தில் வெளியாகும் மலையாள மொழி நாளிதழ்கள் தலைப்புச் செய்தி வெளியிட்டன. இதில் எது உண்மை?
கடந்த பல மாதங்களாக எதிர்பார்ப்புகளைக் கிளப்பி வந்த சரக்கு, சேவை வரி (ஜிஎஸ்டி) மசோதா நாடாளுமன்றத்தில் நிறைவேற்றப்பட்டு, வரும் ஜூலை மாதம் 1-ஆம் தேதி முதல் நடைமுறைக்கு வர இருக்கிறது.
இந்தப் புதிய வரியால், ஏற்கெனவே நடைமுறையில் இருந்த விற்பனை வரி, சேவை வரி உள்ளிட்ட பல வரிகளுக்குப் பதிலாக, நாடு முழுவதும் சீரான வரி விகிதம் அமலாகிறது. வரி தொடர்பான நடவடிக்கைகளையும் மாநிலங்களுக்கிடையே வரிகளைப் பகிர்ந்தளிப்பதை ஒருங்கிணைக்கவும் ஜிஎஸ்டி கவுன்சில் என்ற அமைப்பை மத்திய அரசு ஏற்படுத்தியுள்ளது. எனினும், புதிய வரியால் மாநிலங்கள் வசமிருந்த வரி வசூலிக்கும் உரிமை, மத்திய அரசு வசம் சென்றுவிடும் என்ற அச்சவுணர்வு எழுப்பப்படுகிறது. ஆனால், வரி வசூலை முறைப்படுத்த மட்டுமே நடவடிக்கை எடுக்கப்பட்டுள்ளதாகவும் மாநிலங்களின் உரிமைகளைத் தட்டிப் பறிக்கவில்லை என்கிறது மத்திய அரசு. வரி வருவாய் மாநில அரசுகளுக்கே அளிக்கப்படும் என்று கூறியுள்ளது.
மக்கள் அன்றாடம் பயன்படுத்தும், சில்லறை விற்பனையில் உள்ள அரிசி உள்ளிட்ட தானியங்கள், கோதுமை மாவு, பால், வெல்லம் போன்ற அத்தியாவசியப் பொருட்களுக்கு வரி விதிப்பு இல்லை. மற்ற பொருட்களுக்கு அவற்றின் தன்மைக்கேற்ப 5% முதல் 24% வரை ஜிஎஸ்டி வரி விதிக்கப்படுகிறது.
சுமார் 81 சதவீத பொருள்கள் 18 சதவீத வரம்புக்குள் அடங்கி விடுகின்றன. மீதியுள்ள 19 சதவீத பொருள்களுக்கு மட்டுமே 18 சதவீதத்துக்கு மேல் வரி விதிக்கப்படும்.
நாடு முழுவதும் ஒரே மாதிரியான வரி விதிப்பதால் ஏற்படும் லாபங்களை நாம் கணக்கிலெடுத்துப் பார்த்தாலே ஜிஎஸ்டி தொடர்பான அச்சவுணர்வு குறைந்து விடும். உதாரணமாக, தேயிலையின் விலை அஸ்ஸôம் போன்ற மாநிலங்களில் குறைவு. தென்னிந்தியாவில் அதிகம். காரணம் அனைவருக்கும் தெரிந்ததுதான் – சரக்குப் போக்குவரத்து. தேயிலைக்கு ஒவ்வொரு மாநிலத்திலும் விதிக்கப்படும் வரி விகிதம் வித்தியாசப்படுகிறது. தவிர, மாநில எல்லைகளில் விதிக்கப்படும் சுங்க வரிகள், மற்ற மாநிலத்தில் இருந்து இறக்குமதி செய்யப்படுவதற்கான வரிகள் அனைத்தும் சேர்ந்து விற்பனை வரியுடன் நுகர்வோர் தலையிலேயே விழும். விற்பனையாளர்களுக்கும் பல்வேறு இடங்களில் வரி கட்ட வேண்டிய கட்டாயம் ஏற்படுகிறது. இவையெல்லாம் ஜிஎஸ்டி விதிக்கப்படுவதால் குறையும். அதனால், பொருள்களின் மீது வீணாக சுமத்தப்படும் விலையும் குறையும். மேலும், வரி செலுத்துவதை முறைப்படுத்துவதால் கள்ளச் சந்தைகளில் விற்பதும், பொருள்களைக் கடத்துவதும் வெகுவாகக் குறையும். தொடக்கத்தில் இதனால் சில சிரமங்கள் தெரிந்தாலும் நீண்ட கால நோக்கில் நன்மைகள் கிடைக்கும்.
வரி வருவாயில் மாநிலங்களின் பங்களிப்புக்கு ஏற்ற வகையில் வருவாயைப் பிரித்துத் தருவதற்காக பல்வேறு மாநிலங்களைச் சேர்ந்த வணிக வரித் துறை அதிகாரிகள் கொண்ட குழுவும் அமைக்கப்பட்டுள்ளது. ஜிஎஸ்டி அமலாக்கத்தால் ஏற்படும் இடர்களைக் களைவதற்கு இந்தக் குழு ஆய்வு செய்யும்.
நாட்டின் தென் பகுதியில் உள்ள ஐந்து மாநிலங்கள் கடுமையாக பாதிக்கப்படும் என்ற பிரசாரம் முன்வைக்கப்படுகிறது.
தங்கத்துக்கான ஜி.எஸ்.டி. வரி விகிதம் குறித்த தகவலை ஒவ்வொரு ஊடகமும் அதனதன் வழியில் வெளியிட்டது போல, பல்வேறு அத்தியாவசியப் பொருள்கள் குறித்து, பல்வேறு ஊடகங்கள் வெளியிட்ட ஊகச் செய்திகள் மக்களைக் குழப்பத்தில் ஆழ்த்தி வருகின்றன. அதனால்தான் அரசே விளம்பரம் வெளியிட்டு விளக்க வேண்டிய நிலை எழுந்திருக்கிறது.
எனவே குழம்பவோ குழப்பவோ அவசியமே இல்லை.
மேலும், இந்த வரி விகிதங்கள் எதுவும் நிரந்தரமல்ல. மறு ஆய்வுக்கு உள்பட்டது. ஜி.எஸ்.டி.விகிதங்களை அறிவித்த பிறகு பல்வேறு தரப்புகளில் வந்த எதிர்ப்பு, ஆலோசனைகளைப் பரிசீலிக்க கடந்த ஞாயிற்றுக்கிழமை நடைபெற்ற ஆய்வுக் கூட்டத்தில் 66 பொருள்களுக்கு வரி விகிதம் குறைக்கப்பட்டது.
அகர்பத்திக்கு 5 சதவீதமாக வரி குறைக்கப்பட்டது. கணினி பிரிண்டர்களுக்கு 28 சதவீதமாக நிர்ணயிக்கப்பட்டிருந்த வரி, 18 சதவீதமாகக் குறைக்கப்பட்டது. சினிமா டிக்கெட்டுக்கு வரி விகிதம் மாற்றப்பட்டது: ரூ. 100-க்கு குறைவாக உள்ள சினிமா டிக்கெட்டுக்கு 18 சதவீத வரி; ரூ.100-க்கு அதிகமாக உள்ள சினிமா டிக்கெட்டுக்கு 28 சதவீதம் என முடிவெடுக்கப்பட்டது. குழந்தைகள் ஓவியம் வரையப் பயன்படுத்தும் நோட்டுகளுக்கு முழு வரி விலக்கு அறிவிக்கப்பட்டது.
எனவே பெரும்பாலான மக்களின் அன்றாட வாழ்வில் தொடர்புடைய பொருள்களுக்கு வரி விதிப்பு விகிதத்தை மறு பரிசீலனை செய்யும் முறை உள்ளது என்பது தெளிவு.
இதைத் தவிர, மத்திய அரசு இதுதொடர்பாக பல்வேறு தரப்பினரிடம் யோசனைகளையும் வரவேற்றுள்ளது. மேலும் @askgst_goi என்ற சுட்டுரைப் பக்கத்தின் மூலம் பொதுமக்கள் மற்றும் வர்த்தகர்களின் சந்தேகங்களுக்கும் கேள்விகளுக்கும் பதிலளிக்கப்படுகின்றன. 1800-1200-232 என்ற இலவச அழைப்பு எண் அறிமுகப்படுத்தப்பட்டுள்ளது.
ஜிஎஸ்டி-யைக் கண்டு அச்சப்பட்டுக் கொண்டிராமல், வரி சம்பந்தமான யோசனைகளையும் தெரிவிக்க வேண்டியது வர்த்தக அமைப்புகள் மற்றும் பொதுமக்களின் கடமையாகும். வரி விதிப்பில் ஏதேனும் சங்கடங்கள் இருந்தால், அதையும் மத்திய அரசுக்கும் ஜிஎஸ்டி கவுன்சிலுக்கும் தெரிவிக்கலாம். தற்போதைய வரி விதிப்பு இறுதியானதல்ல என்பது ஏற்கெனவே பலமுறை தெளிவுப்படுத்தப்பட்டுள்ளது.
அதே போல, ஜிஎஸ்டி தொடர்பான தகவல்களை அவ்வப்போது தெரிந்து கொண்டு அதற்கேற்ற வகையில் வர்த்தகர்கள் தகவமைத்துக் கொள்ள முடியும். ஜி.எஸ்.டி. முறையை நிறுவனங்கள் நடைமுறைப்படுத்தும் நடவடிக்கைகளை மேற்கொள்வதன் மூலம், மென்பொருள் துறையில் ரூ.6,000 கோடிக்கு மேல் வருவாய் கிடைக்க வாய்ப்புள்ளதாக ஒரு ஆய்வு தெரிவிக்கிறது.
மிகப் பெரிய மாற்றத்தைக் கொண்டு வரக் கூடிய புதிய நடைமுறை நாடு முழுவதும் அறிமுகமாகும்போது, சிக்கல் ஏற்படக் கூடியது சகஜம்தான். அவற்றை எதிர்கொண்டு, குறைகளை சரி செய்வதுதான் சரியான வழியாக இருக்கும்.
சில முக்கியப் பொருள்களுக்கு ஜிஎஸ்டி வரி விகிதங்கள்

வரிவிலக்கு அளிக்கப்பட்டுள்ள பொருள்கள்

1. சில்லறை வணிகத்தில் விற்கப்படும் பேக் செய்யாத உணவு தானியங்கள்
2. வெல்லம்
3. பால்
4. முட்டை
5. தயிர்
6. லஸ்ஸி
7. சில்லறை வணிகத்தில் விற்கப்படும் பால் பன்னீர்
8. வணிக முத்திரையில்லாத இயற்கை தேன்
9. காய்கறிகள்
10. வணிக முத்திரையில்லாத கோதுமை மாவு
11. வணிக முத்திரையில்லாத பருப்பு
12. வணிக முத்திரையில்லாத மைதா
13. பிரசாதப் பொருள்கள்
14. உப்பு
15. கர்ப்பத் தடை மாத்திரைகள்
16. மருத்துவ சேவைகள்
17. கல்வி சேவைகள்

5% வரி விதிக்கப்படும் பொருள்கள்

1. சர்க்கரை
2. தேநீர்
3. வறுத்த காப்பி கொட்டை
4. பால் பவுடர்
5. சமையல் எண்ணெய் வகைகள்
6. குழந்தைகளுக்கான பால் உணவுகள்
7. பாக்கெட் செய்யப்பட்ட பால் பன்னீர்
8. துடைப்பம்
9. செய்தித்தாள்கள்
10. பொது விநியோகத் திட்டத்தின் கீழ் விநியோகிக்கப்படும் மண்ணெண்ணெய்
11. சமையல் எரிவாயு
12. நிலக்கரி

12% வரி விதிக்கப்படும் பொருள்கள்

1. நெய்
2. செல்லிடப்பேசி
3. வெண்ணெய்
4. நூடுல்ஸ் உள்ளிட்ட உணவு வகைகள்
5. முந்திரி
6. பாதாம்
7. பழச்சாறுகள்
8. பாக்கெட், பாட்டிலில் அடைக்காத தேங்காய் எண்ணெய்
9. குடை
10. ஊதுபத்தி

18% வரி விதிக்கப்படும் பொருள்கள்

1. கேசத் தைலம்
2. சோப்
3. மூலதனப் பொருள்கள்
4. தொழில்துறை இடைத்தரகுகள்
5. கார்ன் ஃப்ளேக்ஸ்
6. ஜாம்
7. பாஸ்டா
8. சூப் வகைகள்
9. கழிவறைத் தாள்கள், முகம் துடைக்கும் தாள்கள்
10. இரும்பு
11. கணிப்பொறி
12. இங்க் பேனா

24% வரி விதிக்கப்படும் பொருள்கள்

1. வாசனை திரவியங்கள்
2. சிமென்ட்
3. அழகு சாதனங்கள்
4. சூயிங் கம்
5. பட்டாசுகள்
6. மோட்டார் சைக்கிள்

 

பெட்டிச் செய்தி 1

1,211 பொருள்களுக்குப் புதிய வரி விகிதம்!

ஜிஎஸ்டி தொடர்பான ஒருமித்த கருத்துகளை ஏற்படுத்துவதற்காகவும், வரி விகிதங்களை விவாதிப்பதற்காகவும் மத்திய நிதியமைச்சர் அருண் ஜேட்லி தலைமையில் மாநில நிதியமைச்சர்கள் இடம்பெற்றுள்ள ஜிஎஸ்டி கவுன்சில் அமைக்கப்பட்டுள்ளது. இந்த கவுன்சில் சார்பில் இதுவரை 16 ஆலோசனைக் கூட்டங்கள் நடைபெற்றுள்ளன.
ஜிஎஸ்டி வரம்புக்குள் இதுவரை 1,211 பொருள்களுக்கு வரி நிர்ணயிக்கப்பட்டுள்ளது.

 

பெட்டிச் செய்தி 2

காணாமல் போகும் வரிகள்

ஜிஎஸ்டி அமல்படுத்தப்படுவதால் கீழ்க்கண்ட வரிகளும் ஜிஎஸ்டி வரம்புக்குள் சேர்க்கப்படுகின்றன:
1. மத்திய உற்பத்தி வரி (சி.இ.டி)
2. சொத்து வரி
3. வர்த்தக வரி
4. மதிப்புக் கூட்டு வரி
5. உணவு வரி
6. மத்திய விற்பனை வரி (சி.எஸ்.டி)
7. பொழுதுபோக்கு வரி
8. நுழைவு வரி
9. கொள்முதல் வரி
10. சொகுசு வரி
11. விளம்பர வரி
12. லாட்டரி வரி
13. சுங்கத் தீர்வை

 

(தினமணி வர்த்தகப் பக்கம் – 12-06-2017)

 

Posted in Uncategorized | Leave a comment

அப்பா – சிறுகதை

அப்பா இல்லை. போய் சேர்ந்துவிட்டார் என்ற தகவல் வந்த போது, அழத் தோன்றவில்லை மகாவுக்கு.
அவர் மறைவுக்கெல்லாம் அழுது கண்ணீரைத் தீர்த்துடக் கூடாது என்று தீர்மானித்தாள். அப்பாவை நினைக்கும் போதெல்லாம் நல்ல சம்பவம் எதுவும் அவள் நினைவுக்கு வரவில்லை. எடுத்ததற்கெல்லாம் கோபப்படும் அவரது குணமும், அதனால் பாதிக்கப்பட்ட தனது இளம் பருவம் மட்டுமே ஞாபகத்துக்கு வந்தது,
அவர் சாவுக்குப் போக வேண்டுமா? என்று யோசித்தாள். பதினைந்து ஆண்டுகளாக அறுபட்டிருந்த உறவைப் புதுப்பித்துக் கொள்ள வேண்டாமே என்று கூட நினைத்தாள். ஆனால், கோபம் அப்பா மீதுதான். வீட்டில் உள்ள மற்றவர்களிடம் இல்லை என்பதால் அவர்களையாவது பார்க்க முடியும் என்ற நப்பாசை எழுந்தது.
குமார் இன்னும் வீட்டிற்கு வரவில்லை. மகளுக்கு இது பத்தாம் வகுப்பு. அவளைக் கூட்டிக்கொண்டு போக முடியாது. தாத்தாவின் முகத்தை பேத்தி பார்த்து ஒன்றும் ஆகப் போவதில்லை. இப்படி ஓர் உறவு இருப்பது அவளுக்குத் தெரியாமல் போவதே நல்லது.
குமாரை அலைபேசியில் அழைத்தாள்.
“அப்பா செத்துட்டாருன்னு தங்கச்சி போன் பண்ணா. போயிட்டு வர வா?” என்று கேட்டாள்.
“அதுக்கு எதற்கு அனுமதி? மாமாவைப் பார்க்க நானும் வர்றேனே” என்று கேட்டான் குமார்.
“அதெல்லாம் வேணாம். எனக்கே அந்தாள் அப்பனில்லன்னு சொல்றேன். மத்தவங்கள பார்க்கதான் நானே போறேன். உங்களுக்கு மட்டும் என்ன மாமா உறவு? நீங்க வர வேணாம். நான் திரும்ப வர்ற வரைக்கும் சீக்கிரமா வீட்டுக்கு வந்து பாப்பாவை பார்த்துக்கோங்க” என்று வெடுக்கென்று சொல்லிவிட்டு போனை வைத்தாள்.
நான்கு நாள் தங்குவதற்குத் தேவையான உடைகளை எடுத்துக் கொண்டாள். வீட்டைப் பூட்டினாள். அப்பாவின் மேல் இருந்த கோபம் பூட்டைப் பூட்டும் போது தெரிந்தது. சாவியை மேல் வீட்டில் கொடுத்து விட்டு பேருந்து நிலையத்தை நோக்கி நடக்க ஆரம்பித்தாள்.
****
நான்கு மணி நேர பேருந்துப் பயணத்தில் இளமைக் கால நினைவுகள் ஒவ்வொன்றாக வந்து சென்றன. வீட்டுக்கு மூத்த பெண்ணாகப் பிறந்ததால் தனக்கு மகாலட்சுமி என்ற பெயர் வந்ததைத் தவிர, வேறு எந்த நன்மையும் தான் அடைந்ததாகத் தெரியவில்லை. அவள் மட்டுமல்ல, அவளுக்குப் பிறகு பிறந்த இரண்டு தங்கைகளும், கடைசியாகப் பிறந்த தம்பியும்தான்.
தம்பியும் இப்போது வளர்ந்திருப்பான். “இருபது வயசு இருக்குமா, அவனுக்கு?’ என்று கேட்டுக் கொண்டாள். அடிப்பதில் பெரியவர், சிறியவர் என்ற வித்தியாசத்தை அப்பா பார்த்ததே இல்லை. ஐந்து வயது தம்பி ராமுவுக்குக் கூட நல்ல அடி கிடைக்கும்.
பெண் பிள்ளைகளை எப்படி வளர்க்கக்கூடாது என்பதற்கு அப்பாதான் உதாரணம். வீட்டில் உள்ளவர்களுக்கு எப்போதும் அடி, உதைதான். பெண் பிள்ளைகளை அடிக்கக்கூடாது என்று யாராவது சொன்னால் கோபம் பொத்துக்கொண்டு வரும். “எல்லாம் எனக்குத் தெரியும். வந்துட்டானுங்க புத்தி சொல்ல” என்பார்.
அப்பா வீட்டிற்குள் வந்துவிட்டாலே மயான அமைதி நிலவும். எப்போது அவருக்குக் கோபம் வரும் என்பது யாருக்கும் தெரியாது. கோபம் வந்தால் மாட்டியவர்களின் கதி அதோகதிதான். அடிக்கடி அம்மாதான் மாட்டிக்கொண்டாள். அந்த காலத்து பெண்மணி அவர். குழந்தைகளுக்காக எதையும் தாங்கும் மரமாகிப் போனார்,
அடுத்தபடியாக, மூத்த மகள் என்பதால், மகாவுக்குதான் அதிக அடி கிடைக்கும். அதனால், அவளுக்கு அப்பாவைப் பிடிக்காது. அம்மாவைப் போல அவள் அமைதியாகவும் இல்லை. வார்த்தைக்கு வார்த்தை அப்பாவிடம் எதிர்த்துப் பேசுவாள். அடி இன்னும் பலமாக விழும்.
மற்றபடி மூன்று பெண்களையும் கடைக்குட்டி பையனையும் அப்பா நன்றாகவே படிக்க வைத்தார். படிக்க வைப்பதில் பாலின பாகுபாடு காட்டுவது அவருக்குப் பிடிக்காது. ஆனால், அதெல்லாம் ஏன் தனது மனதில் நிற்கவில்லை என்பது அவளுக்கு இன்னும் புதிர்தான்.
கல்லூரியில் படிக்கும் காலத்தில் இன்னொரு கொடுமையையும் அவள் சந்தித்தாள். கல்லூரிக்கு அனுப்பி விட்டு, மகளுக்குத் தெரியாமல் அப்பா பின்தொடர்வார். என்றாலும், மகாவுக்கு அது புரிந்தே இருந்தது.
“ச்சே… என்ன அப்பா இவர்’ என்று உடம்பெல்லாம் கூசும்.
படிப்பு முடிந்ததும், அப்பாவை எதிர்த்து வீட்டை விட்டு வெளியேறினாள். ஒரு விடுதியில் தங்கி அலுவலகம் ஒன்றில் பணிபுரிந்த போதுதான், குமாரைச் சந்தித்தான். அவளுடைய நிலைமை புரிந்தும், குமார் திருமணம் செய்து கொள்ள விருப்பப்பட்டான். இருவரும் திருமணம் செய்துகொண்டு அப்பாவின் முன்னால் நின்றார்கள். ஏறிட்டுப் பார்த்து, “இந்த ஓடுகாலி இப்படி செய்யும்னு நெனச்சேன். உன்ன…” என்று சொல்லிவிட்டு கை ஓங்கினார்.
குமார்தான் தடுத்தாள். மகாவுக்கு கோபம் வந்தது.
“நீ யாருய்யா என்ன ஓடுகாலின்னு சொல்ல. நீ ஒழுங்கா வளர்த்திருந்தா, நான் ஏன் ஓட போறேன்?” என்று கேட்டு விட்டு, குமாரை இழுத்துக்கொண்டு வெளியேறினாள். அதன் பிறகு பிறந்த வீட்டின் பக்கம் மகா தலை வைத்து கூட படுக்கவில்லை. இரண்டு தங்கைகளுக்கும் திருமணம் முடிந்த செய்தி தோழிகள் மூலம் வந்ததோடு சரி.
குமாருக்கு மகாலட்சுமியைப் பற்றி புரிந்ததால் புகுந்த வீட்டில் பிரச்னை எதையும் அவள் சந்திக்கவில்லை. மகள் பிறந்ததும் பழைய வாழ்க்கை கனவு போல ஆனது. அப்படியும் சில நேரங்களில் இளம் பருவ நினைவுகள் அவளுக்குள் தலைதூக்கும். அப்படிப்பட்ட நேரங்களில் துடித்து போவாள்.
****

“வேலூர் வந்தாச்சு. இறங்குங்க” என்றார் கண்டக்டர். மகா இறங்கி கொண்டாள். பேருந்து நிலையத்தில் இருந்து பத்து, பதினைந்து நிமிடங்களில் வீட்டிற்குச் சென்றுவிடலாம். சொந்த வீடு என்பதால் வீடு மாறவில்லை. பெரிய தங்கை போன் செய்து தகவல் சொல்லும்போது, அப்பாவுடன், அம்மாவும் கடைசி தங்கையும் மாப்பிள்ளையும் உடனிருந்ததாகச் சொன்னாள். தம்பியும் அப்பாவுடன் தான் இருந்திருப்பான்.
வீட்டிற்குள் நுழைந்தாள். கூட்டம் அதிகமாக இருந்தது. மகாவைப் பார்த்தவுடன் சொந்தங்கள் கிசுகிசுக்க ஆரம்பித்தார்கள். தான் இருப்பது அப்பாவின் இறுதி காரியத்தில் என்ற நினைப்பு வர உடனே அமைதியாக அப்பாவின் உடல் பக்கம் நகர்ந்தாள்.
அப்பாவின் பிணத்திற்கு அருகில் அழுதழுது கலங்கிய கண்களோடு அம்மாவும், தங்கைகளும் அமர்ந்திருந்தார்கள். பல ஆண்டுகளுக்குப் பிறகு மகளை பார்த்த அம்மா, “நம்மை விட்டு போயிட்டாருடீ…” என்று பெருங்கூச்சலிட்டு அழத் தொடங்கினாள். இரண்டு தங்கைகளும் பின்னணியில் கூச்சலிட்டார்கள். மகாவுக்கு அழுகை வரவில்லை. கல்லைப் போல அமர்ந்திருந்தாள்.
“என்ன இருந்தாலும் பெண் பிள்ளைக்கு இவ்வளவு ரோஷம் கூடாதும்மா” என்று ஒரு குரல் கூட்டத்தின் மத்தியில் எழுந்தது. மகா கோபமாகக் கண்களை சுழற்றினாள்.
ஓர் இளைஞன், “உஷ்.. உஷ்..’ என்று அதட்டினான். அவனை ஏறிட்டுப் பார்த்தாள். அவன் கண்களும் கலங்கியிருந்தன. அவன் தான் ராமு என்பதை உணர்ந்து கொண்டாள்.
அரவணைப்பாக அவன் தோளைத் தொட்டாள். அக்காவின் தொடுதல் அவனுக்கு அழுகையை வரவழைத்தது.
“அக்கா…” என்று விசும்பத் தொடங்கினான். அவளுக்கு ஏனோ வெறுப்பு வந்தது. கையை எடுத்துக் கொண்டு, பார்வையை அக்கம் பக்கம் சுழல விட்டாள்.
தங்கைகளோடு இரண்டு, மூன்று குழந்தைகளும் இருந்தன. ஒரு பையன் அழகாகப் புன்னகைத்தான். மகா சூழ்நிலையை மறந்து, அவனை நோக்கி கைகளை நீட்டினாள். இரண்டாவது தங்கை அவனை தரதரவென்று இழுத்து வைத்துக்கொண்டு, மகாவை முறைத்தாள்.
“”நேரமாச்சு… தூக்கணும். வாய்க்கரிசி போட எல்லோரும் வாங்க” என்று குரல் கேட்டது. எல்லோரும் வாய்க்கரிசி இட்டார்கள். மகாவும் போட்டாள். போடும் போது, “”உனக்கெல்லாம் தண்டச் சோறு போடணும்னு என் தலையெழுத்து” என்ற அப்பாவின் குரல் ஒலித்தது. சட்டென்று கண்களை மூடிக் கொண்டாள்.
இறுதிச்சடங்கு முடியும் வரை மகாவின் கண்களில் ஒரு சொட்டு கண்ணீர் கூட வரவில்லை. ஊராரும், சொந்த பந்தங்களும் மகாவுக்கு ஆதரவாகவும், எதிராகவும் கட்சி சேர்ந்தனர். அவள் எதையும் சட்டை செய்யவில்லை.
இரண்டு நாட்கள் கழிந்தன. மகா அம்மாவின் வீட்டில் தான் தங்கியிருந்தாள். வீட்டில் மற்றவர்களோடு ஒன்றிரண்டு வார்த்தைகள் மட்டுமே பேசினாள். மகள் இரண்டு நாட்களாக கூட இருப்பது அம்மாவுக்கு ஆறுதல் என்றாலும், அதை சொல்லக் கூடிய மனநிலையில் இல்லை.
அப்போது ஒருவர் துக்கம் விசாரிக்க வீட்டிற்குள் நுழைந்தார்.
“”ஐயா செத்த அன்னைக்கு ஊர்ல இல்லேம்மா… அவர் போனது ரொம்ப சங்கடமா இருக்கு” என்று அம்மாவிடம் ஆறுதலாகப் பேசினார்.
பிறகு அவரது கண்கள் நாலாப் பக்கமும் சுழன்றன. மகாவைப் பார்த்தது நெற்றியை சுருக்கினார். ராமு மெதுவாக, “இவங்கதான் பெரிய அக்கா” என்றான்.
“ஓ… நீதானா தாயி அது… நீ ஊர விட்டு போனதுக்கு அப்புறம்தாம் நான் உங்க அப்பாவுக்குப் பழக்கம். என் பொண்ணு பேரும் மகாலட்சுமிதான். அதனாலேயே எங்க வீட்டுக்கு ஐயா அடிக்கடி வருவாரு. அந்த மகாலட்சுமிய தான் புரிஞ்சுக்காம விரட்டிட்டேன். இந்த மகாலட்சுமி கிட்டயாவது ஆறுதல் கிடைக்குமேன்னு வர்றேன்னு சொல்லுவாரு…” என்று அவர் பேசிக் கொண்டே போனார்.
அதற்கு மேல் அவர் பேசியது எதுவும் மகாவின் காதில் விழவில்லை. மீறி வந்த அழுகையை அவளால் அடக்க முடியவில்லை.

 

(தினமணி கதிர் – 23-04-2017)

 

 

Posted in Uncategorized | Leave a comment

கசப்பான உண்மை

÷கடந்த சில ஆண்டுகளாகவே மழை தமிழர்களை அச்சுறுத்தி வருகிறது. கடந்த ஆண்டு பெய்த பெருமழையால், சென்னை உள்பட சில மாவட்டங்கள் நீரில் மூழ்கின. ஆனால், நிகழாண்டிலோ மழை பொய்த்து, வறட்சியால் மடிகிறோம்.
÷தொழில்நுட்பமும் நகரமயமாகும் வாழ்க்கை முறையும் ஒருபுறம் அதிகரித்து வந்தாலும், நம் நாட்டில் 60 சதவீத மக்கள் விவசாயத்தை மட்டுமே நம்பி வாழ்கிறார்கள். அவர்களின் தரத்தை மேம்படுத்த இத்தனை ஆண்டுகளில் தகுந்த முயற்சிகள் இதுவரை மேற்கொள்ளப்பட்டுள்ளதா? வறட்சி போன்ற சூழல்களில் விவசாயம் சார்ந்த பிற தொழில்களில் ஈடுபடுவதற்கு விவசாயிகளுக்கு பயிற்சியளிக்கப்பட்டுள்ளதா? போன்ற பல்வேறு கேள்விகள் எழுகின்றன.
÷முன்பெல்லாம் கோயில்கள் கட்டப்படும் இடங்கள் தோறும் குளங்களும் அமைக்கப்படும். காவிரி, வைகை முதலான ஆறுகளும் ஏரிகளும் குளங்களும் தமிழர் வாழ்வின் விழுமியங்களைப் பேசுபவை. ஆனால், அவற்றின் இன்றைய நிலையை சொல்லித் தெரிய வேண்டியதில்லை.
÷சென்ற ஆண்டில் பெய்த மழைநீரை ஏரிகள், முறையாக சேமித்து வைத்திருந்தாலே, தற்போது நிலவும் வறட்சியை ஓரளவுக்கு கட்டுப்பாட்டில் வைத்திருக்க முடியும். ஆனால், கடந்த சில ஆண்டுகளாகவே ஏரிகளும் குளங்களும் தூர்வாரப்படாமல் ஆக்கிரமிப்புகளுக்கு உள்ளாகி வருகின்றன. இதனால், உபரியாகக் கிடைக்கும் மழைநீர் சேமிக்க வழியில்லாமல் வீணாக கடலில் கலக்கிறது.
÷இதுபோன்ற நிலைமைகளை சீரமைப்பது நீர்பாசனத் துறையின் பணியாகும். மொழி வாரி மாநிலமாக, சென்னை மாகாணத்தில் இருந்து கர்நாடகம் பிரிந்தது முதலே அங்கு நீர்ப்பாசனத்துக்கு என தனியாக ஒரு அமைச்சகம் செயல்படுகிறது. காவிரி நீர் பிரச்னையாகட்டும், மற்ற நீர் பிரச்னைகளாகட்டும் கர்நாடகத்தின் சார்பில் நீர்ப்பாசனத் துறை அமைச்சர் பேச்சுவார்த்தைகளில் ஈடுபடுகிறார். விவசாய நிலங்களுக்கு நீர் பாய்ச்சுவது முதல் கோடை வெப்பத்துக்கு ஏற்ப நீர்நிலைகளை அமைப்பது வரை பல்வேறு பணிகளில் அந்த அமைச்சர் ஈடுபடுகிறார். ஆனால், அதை விடவும் அதிகமான நீர்நிலைகளை வைத்திருந்த தமிழகத்தில் நீர்பாசனத்துக்கென தனி துறை உருவாக்கப்பட்டு, அதற்கான அமைச்சர் நியமிக்கப்படவில்லை.
÷மேலும், தனி வாரியத்தை அமைத்து விவசாயம் மற்றும் அதன் சார்பு தொழில்கள் குறித்த முறையான கல்வியறிவை ஏற்படுத்த வேண்டும். குறைந்தபட்சம் கிராமப்புற மாணவர்களுக்கு எட்டாம் வகுப்பு வரை மட்டுமாவது கட்டாய விவசாயக் கல்வி பயிற்றுவிக்கப்பட வேண்டும். விவசாயம் சார்ந்த தொழில்கள், கால்நடைகள் பராமரிப்பு, நவீன தொழில்நுட்பங்களைப் பயன்படுத்தி வேளாண் துறையை தரமுயர்த்துவது தொடர்பான சான்றிதழ் கல்விகள் அளிக்கப்பட வேண்டும்.
÷தொழில் துறையும் நவீன தொழில்நுட்பங்களும் பெருகி வரும் இன்றைய காலகட்டத்தில், விவசாயத் துறைக்கு என தனியாக பட்ஜெட் தாக்கல் செய்யப்பட வேண்டும். அதில், விவசாயத் துறை மேம்பாடு, வறட்சி சூழலை சமாளிப்பது, வெள்ள நிவாரணம் உள்ளிட்ட விவசாயம் சார்ந்த நடவடிக்கைகளைப் பரிசீலித்து, உரிய வகையில் நிதி ஒதுக்கப்பட வேண்டும். முக்கியமாக, கால்நடைகளைப் பராமரிப்பின் மூலம் ஏற்படும் பலன்கள் குறித்த விழிப்புணர்வை ஏற்படுத்த வேண்டும்.
÷பல மாதங்கள் உழைத்து அறுவடை செய்ததற்கான பலன்களை விவசாயிகள் நேரடியாகப் பெற முடிவதில்லை. இடைத்தரகர்கள் மூலமாகவே உற்பத்திகளை சந்தைப்படுத்த நேரிடுகிறது. இதனால், விவசாயிகளுக்கு உரிய லாபம் கிடைப்பதில்லை. சில நேரங்களில் நஷ்டமும் அடையும் நிலை உள்ளது. மாறாக, தங்கள் உற்பத்திப் பொருளுக்கு உரிய லாபத்தை விவசாயிகள் பெறுவதை உறுதிசெய்ய வேண்டும். விவசாயிகள் தாங்கள் விதைத்த பொருள்களை நேரடியாக சந்தைப்படுத்துவதை மத்திய-மாநில அரசுகள் ஊக்குவிப்பது அவசியம். அதற்கான திட்டங்களை அமல்படுத்துவதோடு, அது பற்றிய விழிப்புணர்வையும் ஏற்படுத்துவது அரசின் கடமை. சில ஆண்டுகளுக்கு முன்பு மாவட்டந்தோறும் உழவர் சந்தைகள் அமைக்கப்பட்டதால், விவசாயிகளும் நுகர்வோரும் பெருமளவில் பயனடைந்தனர். ஆனால், அதிலும் குறைகள் ஏற்பட்டதால், பிற்காலத்தில் அந்தச் சந்தைகள் காணாமல் போயின.
÷மேலும், சமீப காலங்களில் இயற்கை விவசாயம் தொடர்பான ஆர்வம் நகர்ப்புறங்களில் ஏற்பட்டுள்ளது. இத்தகைய சூழலை பயன்படுத்தி இயற்கை பொருள்களைத் தயாரிப்பது தொடர்பாக, விவசாயிகளுக்கு பயிற்சியளிக்கப்பட வேண்டும்.
÷விவசாயத்துக்குத் தேவைப்படும் விதைகளின் விற்பனை தனியாரிடமே இருக்கிறது. இதனால், அதிக விலை கொடுத்து விதைகளை வாங்க வேண்டியுள்ளது. இதனால் ஏற்படும் நஷ்டங்களைக் கணக்கிட்டு, விவசாய நிலங்களை பலர் விற்று விடுகின்றனர். இந்த நிலை மாற வேண்டுமானால், விதைகளின் விற்பனையை அரசே ஏற்க வேண்டும்.
÷பயிரிடும் காலம் முதல் அறுவடை காலம் வரை விவசாயிகள் கடுமையாக உழைக்க வேண்டியுள்ளது. ஆனால், அதற்குரிய பயன் அவர்களுக்கு கிடைப்பதில்லை. 2-ஆவது ஐந்தாண்டு திட்டத்தில் விவசாயிகளுக்கு குறைந்தபட்ச ஆதரவு விலை அளிக்கப்படும் என்று அறிவிக்கப்பட்டு, 50 ஆண்டுகளுக்கு மேலாகிவிட்டது. ஆனால், அதை இன்னும் உறுதிசெய்ய முடியவில்லை. டன் கரும்புக்கு ரூ.2,500 குறைந்தபட்ச ஆதரவு விலை நிர்ணயிக்கப்பட்டாலும், நடைமுறையில் பல்வேறு இடைத்தரகர்களிடம் சிக்கிக் கொண்டு, ரூ.1,000 மட்டுமே விவசாயிகளுக்கு கிடைக்கிறது. இந்த நிலையை மாற்றி, பிற உற்பத்தியாளர்களுக்கு நிர்ணயித்திருப்பதுபோல விவசாயிகளுக்கும் உரிய லாபத்துடன் அதிகபட்ச ஆதரவு விலை நிர்ணயிக்கப்பட வேண்டும்.
÷விவசாயிகளின் இத்தகைய நியாயமான கோரிக்கைகளுக்குத் தீர்வு காணாத வரை, விவசாயத்தில் இருந்து விவசாயிகள் வெளியேறுவதையோ, அவர்கள் விபரீதமான முடிவுகளை எடுப்பதையோ தடுக்க முடியாது என்பதே கசப்பான உண்மை.

 

(தினமணி 16-01-2017)

Posted in Uncategorized | Leave a comment

வேண்டாம் பிரிவினை கோஷம்

“தமிழர் என்றொரு இனமுண்டு தனியே அதற்கொரு குணமுண்டு’ என்று பாடினார் நாமக்கல் கவிஞர். கல் தோன்றி மண் தோன்றா காலத்தே முன் தோன்றிய தமிழைத் தாய்மொழியாகக் கொண்டவர்கள் நாம். ஐவகை நிலங்களாகப் பிரிந்து குன்றாத இலக்கிய வளங்களுடன் வாழ்வாங்கு வாழ்ந்தவர்கள் நாம். அதே நேரத்தில், இந்திய ஒருமைப்பாட்டுடன் தமிழகம் ஒன்றியிருந்ததற்கான ஆதாரங்கள், இமயமலையில் சேர மன்னன் கொடி நாட்டியது முதல் சங்க காலம் தொட்டு ஏராளமாக உள்ளன.
அந்தப் பாரம்பரியத்தின் நீட்சியாகவே, விடுதலை வேள்வியில் தமிழர்கள் முன்னணியில் இருந்தார்கள். தமிழகத்தைச் சேர்ந்த எத்தனையோ வீரர்கள், மற்ற மாநிலத்தவருக்கும் விடுதலை தீயை மூட்டினார்கள். விவேகானந்தர் போன்றவர்களை உலகுக்கு அறிமுகம் செய்து வைத்தவர்கள் தமிழர்களே. சுதந்திர இந்தியாவின் கட்டமைப்பிலும் ராஜாஜி, காமராஜர் போன்ற தமிழகத் தலைவர்களின் பங்களிப்பு அதிகம். அதே போல், தேசிய அளவிலும் சர்வதேச அளவிலும் இந்தியாவுக்கு பெருமை சேர்க்கும் நிபுணர்களிலும் தமிழர்களின் எண்ணிக்கை கணிசமானது. இதைக் கொண்டு பல்வேறு சாதனைகள் தமிழகம் மேற்கொண்டிருக்க முடியும்.
ஆனால், “இந்தியரும் தமிழரும் வேறு, வேறு’ என்று பிரசாரம் செய்யப்பட்டது. ஒரு கட்டத்தில் “தனித் தமிழ்நாடு’ கோரிகை தீவிரமடைந்தது. “அடைந்தால் திராவிட நாடு; இல்லையேல் சுடுகாடு’ என்ற கோஷம் முழங்கியது. சீன யுத்தத்துக்குப் பிறகு, தனி திராவிட நாடு என்ற வாதம் கைவிடப்பட்டது. அதன் பிறகே, தமிழக ஆட்சியில் திராவிட இயக்கங்கள் அமர முடிந்தது. இடையில் அவ்வப்போது தனிநாடு கோஷங்கள் எழுந்தாலும், மக்கள் ஆதரவு கிடைக்கவில்லை. ஆனால், அதையெல்லாம் கருத்தில் கொள்ளாமல் அண்மைக் காலமாக தனிநாடு கோஷங்கள் மீண்டும் கட்டாயமாகத் திணிக்கப்படுவதுதான் வேதனையளிக்கிறது.
கடந்த சில ஆண்டுகளாகவே தமிழகம் மட்டுமல்லாது மகாராஷ்டிரம், கர்நாடகம் ஆகிய மாநிலங்களிலும் பாரம்பரிய விளையாட்டுகளை நீதிமன்றங்கள் தடை செய்தன. எனவே, ஜல்லிக்கட்டு தடையை எதிர்த்து தமிழர்கள் ஒன்றுபட்டு எழுந்தது வரவேற்கத்தக்கதுதான். தமிழகம் முழுவதும் உருவெடுத்த மாணவர் எழுச்சி, மற்ற மாநிலத்தவருக்கும் உத்வேகம் அளித்திருக்கும் என்பதில் எவ்வித ஐயமுமில்லை.
ஆனால், அந்தப் போராட்டக் களத்தில் தமிழர்கள் நசுக்கப்படுவதாக பிரசாரம் செய்தற்குக் காரணம் என்ன? உரிமைக்காகப் போராடுவதை விடுத்து, இந்திய எதிர்ப்பைக் காட்டுவதில் பயனென்ன? இறுதியில், மாபெரும் போராட்டம், வன்முறையில் முடிந்து கறை படிந்துவிட்டது.
மேலும், காவிரி பிரச்னையில் தமிழகத்துக்குத் தண்ணீர் தராமல் இழுத்தடிக்கும் கர்நாடகம் கண்டிக்கப்பட வேண்டும் என்பதில் மாற்றுக் கருத்தில்லை. ஆனால், இந்த விவகாரத்தில் கர்நாடகம் சமயோசிதமாக செயல்படுவதை தமிழகம் உணர வேண்டும்.
இங்கு அரசியல் காரணங்களுக்காக எழுப்பப்பட்ட திராவிட நாடு கோரிக்கையை கர்நாடக, ஆந்திர, கேரள மக்கள் முழுமையாகப் புறக்கணித்தனர். அதே நேரத்தில், இந்தியாவின் ஒருமைப்பாட்டுடன் இணைந்து தங்களது மாநிலங்களை வலுப்படுத்திக் கொண்டனர். கர்நாடகமும், ஆந்திரப் பிரதேசமும் அரசியல் ரீதியாகத் தங்களை வளப்படுத்திக் கொண்டன என்றால், கேரளம் அதிகாரிகள் மட்டத்தில் பலம் பெற்றது. ஆனால், தமிழர்களாகிய நாமோ இனவாதம் பேசி நமக்குள்ளேயே அடித்துக் கொண்டோம்.
பஞ்சாப், குஜராத், கேரளம் ஆகிய மாநிலங்களில் மீனவர்கள் தாக்கப்படும்போது, சம்பந்தப்பட்ட மாநிலங்கள் தேசிய உணர்வுடன் குரல் எழுப்புகின்றன. ஆனால், ராமேசுவரத்திலும் நாகையிலும் மீனவர்கள் தாக்கப்பட்டால், அதை தமிழ் மீனவர்கள் தாக்கப்படுவதாக மட்டுமே கூறுகிறோம். குறுகிய மனப்பான்மையை விடுத்து இந்திய மீனவர்கள் தாக்கப்படுவதாகக் குரலெழுப்பினால் மீனவர் பிரச்னைக்கு நிரந்தரத் தீர்வு கிடைக்கும்.
இந்திய அரசுடன் இணைந்து இலங்கையை எதிர்ப்பதற்குப் பதிலாக, மீனவர்கள் தாக்கப்படுவதற்கும் இந்திய அரசையும் தூற்றுகிறோம். இவர்கள் கேட்பதைப்போல தமிழகத்தைப் பிரித்துவிட்டால், இலங்கை கடற்படை நமது மீனவர்களைத் தாக்குவது சுலபமாகிவிடும் என்பதே யதார்த்தம்.
நெடுவாசல் போராட்டம் வெடித்தபோது, சுற்றுச்சூழலைப் பாதுகாக்க ஒட்டுமொத்த தமிழினமும் விழித்திருக்க வேண்டும். ஆனால், போராட்டத்தை முன்னெடுத்தவர்களில் சிலர் அணு மின் நிலையம், இயற்கை எரிவாயு போன்ற திட்டங்கள் தமிழகத்தில் மட்டுமே மேற்கொள்ளப்படுவதாக, பிரசாரத்தில் ஈடுபடுகின்றனர். பிரிவினையை விரும்பாத பெரும்பாலான மக்கள், இது சம்பந்தப்பட்ட விவசாயிகளின் போராட்டம் என்று அமைதியாகி விட்டனர்.
உண்மையில், கூடங்குளம், கல்பாக்கம் மட்டுமல்லாது குஜராத், ஆந்திரம், ராஜஸ்தான், அஸ்ஸாம் ஆகிய மாநிலங்களிலும் அணு மின் நிலையங்கள் அமைக்கப்பட்டுள்ளன. இயற்கை எரிவாயு திட்டத்துக்கு நாடு முழுவதும் 39 இடங்களில் அனுமதியளித்திருப்பதாக மத்திய அரசு அறிவித்துள்ளது. இவற்றில், தமிழகத்தில் நெடுவாசல் மற்றும் புதுவையில் உள்ள காரைக்கால் ஆகிய இடங்களைத் தவிர மற்ற இடங்கள், பிற மாநிலங்களைச் சேர்ந்தவையே. இதை மறைத்து, பொய்யான பிரசாரங்களின் மூலம் உணர்ச்சி வேகத்தைத் தூண்டுவது, தமிழர்களை இழிவுப்படுத்தும் நடவடிக்கை அல்லவா? இதேபோன்ற தவறான பிரசாரங்கள்தான், முல்லை பெரியாறு விவகாரத்திலும் எழுப்பப்படுகின்றன. இலங்கை தமிழர்களில் கணிசமானோரின் பூர்வீகம் கேரளமே. இப்படியிருக்கும் போது, தமிழர்களின் உறவுகளான மலையாள மக்களை பிரிப்பது சரியல்ல.
நாம் ஒப்புக்கொண்டாலும், மறுத்தாலும் இந்திய மண்ணுடன் வலுவாக இணைந்திருப்பதுதான் நிகழ்காலத்திலும் எதிர்காலத்திலும் தமிழகத்திற்கு நன்மை தரும் என்பதே யதார்த்த உண்மை. “ஒன்றுபட்டால் உண்டு வாழ்வு’ என்று உரக்க சொன்ன தமிழர்களுக்கும் அந்த வாக்கியம் பொருந்தும். அதை மனதில் கொண்டு ஒருமைப்பாட்டைப் பேணி காத்தால் தமிழகம் நிச்சயம் வளம் பெற முடியும்.

(தினமணி 14-03-2017)

Posted in Uncategorized | Leave a comment

உங்கள் செல்லிடப்பேசியிலிருந்து ரொக்கமில்லா பணப் பரிமாற்றம்!

அண்மைக் காலமாக இந்தப் பெயரை அதிகமாகக் கேள்விப்பட்டு வருகிறோம். இதற்கு ஆதரவாகவும், எதிராகவும் இப்படி பல்வேறு வாதப் பிரதிவாதங்கள் எழுந்துள்ளன. இவற்றுக்கு மத்தியில் ரொக்கமில்லா பரிவர்த்தனைக்கான வழிமுறைகளும், சாத்தியக்கூறுகளும் அதிகரித்துள்ளன. எதிர்காலத்தில் ரொக்கமில்லா பரிவர்த்தனையை யாருமே தவிர்க்க முடியாது என்ற நிலைமை ஏற்பட்டுள்ளது.
இந்த வகை பரிமாற்றங்களின்போது, பணம் வங்கிக் கணக்கு வழியாகத்தான் “கை மாறுகிறது’. ஆனால் இந்த வகை பரிமாற்றங்களை மக்களிடையே பரவச் செய்யவும், அவற்றை பாப்புலர் ஆக்கவும் அதற்கான சில சேவைக் கட்டணங்களை மத்திய அரசு ரத்து செய்திருக்கிறது.
அது மட்டுமல்லாமல், பெட்ரோல் உள்ளிட்ட பல தேவைகளுக்குப் பயன்படுத்தும்போது, தனியாக கட்டணச் சலுகைகளும் வழங்கப்பட்டுள்ளன.
ரொக்கமில்லா பரிவர்த்தனைகள் நாட்டுக்குப் புதியதல்ல. ரூபாய் நோட்டு அறிவிப்புக்கு சில ஆண்டுகளுக்கு முன்னதாகவே பல்வேறு துறைகளில் மேற்கொள்ளப்பட்டு வருவதுதான். இந்தப் பரிவர்த்தனைக்காக ஏராளமான செல்லிடப்பேசி செயலிகளும் செல்லிடப்பேசி வர்த்தக முறைகளும் இருக்கின்றன. தற்போது, அதன் சேவைகள் விரிவுப்படுத்தப்பட்டு வருகின்றன. அதனால், அதன் பயன்பாடுகளைத் தெரிந்து கொள்வது அவசியம்.
செல்லிடப்பேசி வழியாக ரொக்கமில்லா பரிவர்த்தனைகளை மேற்கொள்ள ஸ்மார்ட்போன்தான் வேண்டும் என்பது கட்டாயமில்லை. சில வசதிகளுக்கு இணைய வசதி கூடத் தேவையில்லை என்பது பலருக்குத் தெரியாது. உங்களுடைய செல்லிடப்பேசி எண் இருந்தால் போதுமானது.
செல்லிடப்பேசி வழி வங்கிச் சேவைகளை 24 மணி நேரமும் பயன்படுத்த முடியும். எளிதாகவும் பயன்படுத்தலாம்.
யுபிஐ அல்லது
மொபைல் வங்கியியல்
“யூபிஐ’ (யூனிஃபைட் பேமெண்ட் இண்டர்ஃபியரன்ஸ்) அல்லது மொபைல் வங்கியியல் என்ற சேவையின் பயன்பாடும் தற்போது அதிகரித்து வருகிறது. மொபைல் வங்கி சேவையை அனைத்து வங்கிகளும் சில ஆண்டுகளாகவே வழங்கி வருகின்றன.
உயர் மதிப்பு கரன்ஸி மதிப்பிழப்பு அறிவிப்புக்குப் பிறகு, ரொக்கமற்ற பரிமாற்றத்தின் யுபிஐ சேவையின் பயன்பாடு அதிகரித்து வருகிறது. இதற்கு, இணைய வசதி அவசியமாகும். 24 மணி நேரமும் வங்கிச் சேவையைப் பயன்படுத்த முடியும் என்பது இதன் இன்னொரு சிறப்பம்சம்.
மொபைல் வங்கியியல் என்பதால், யார் வேண்டுமானாலும் பயன்படுத்தி விட முடியாது.
சில வங்கிகள் அதற்காக தனியாக முகவரியையும், கடவுச்சொல்லையும் உருவாக்கித் தருகின்றன. ஆனால், இது மின்னஞ்சல் கணக்கை உருவாக்குவதைப் போல் எளிதானது. இதன் மூலம் பணம் செலுத்துதல், அதே வங்கியிலோ அல்லது மற்ற வங்கிகளிலோ இருக்கும் வங்கிக் கணக்குகளுக்கு பணம் மாற்றுதல், இணையவழி வர்த்தகங்களுக்குப் பணம் செலுத்துதல் ஆகியவற்றை மேற்கொள்ளலாம்.
சில வங்கிகள் நமது வங்கி கணக்குப் புத்தகத்தில் இருக்கும் சிஐஎஃப் (கஸ்டமர் ஐடண்டிஃபிகேஷன் நம்பர்) எண்ணைக் கோருகின்றன. இது இன்னும் பாதுகாப்பானது. இதன் மூலம் மொபைல் வங்கிக் கணக்கைத் தொடங்கி இணையவழி வழியிலோ அல்லது ஏடிஎம் அட்டையுடனோ இணைத்துக் கொள்ள வேண்டும். அதன் மூலம், வங்கிச் சேவையை எளிதாகப் பயன்படுத்திக் கொள்ள முடியும்.
மொபைல் வங்கி சேவையின் மூலம் பயன்பாடுகளை அதிகரிப்பதற்கு, தற்போது வங்கி நிர்வாகங்களே ஊக்கப்படுத்துகின்றன. சலுகைகளை வழங்குகின்றன.
இது தவிர, வாடிக்கையாளர்கள் அல்லாதவர்களுக்கு மொபைல் வர்த்தக சேவைகளையும் வங்கிகள் அறிமுகப்படுத்தியுள்ளன. பிரபல மொபைல் வர்த்தக நிறுவனமான “பேடிஎம்’ பற்றி நிறைய பேர் கேள்விப்பட்டிருப்பீர்கள். அதைப் போலவே, “ஸ்டேட் பேங்க் பட்டி’ என்ற செல்லிடப்பேசி வர்த்தகச் செயலியை பாரத ஸ்டேட் வங்கி அறிமுகப்படுத்தியுள்ளது.
இதே வகையில், பஞ்சாப் நேஷனல் வங்கியின் “பிஎன்பி மொபைல் ஈஸ்’, சிட்டி யூனியன் வங்கியின் “மொபைல் பேங்கிங் பிளஸ்’, பேங்க் ஆஃப் பரோடாவின் “பரோடா எம்-பே’ போன்ற செல்லிடப்பேசி செயலிகளும் நடைமுறையில் உள்ளன.
அவற்றின் மூலம், பொருள் வாங்குதல், செல்லிடப்பேசி ரீசார்ஜ், உணவகங்களில் பணம் செலுத்துதல், ரயில் மற்றும் பேருந்து முன்பதிவு போன்ற சேவைகளைப் பெறலாம். தனியார் வங்கிகளும் இத்தகைய இணைய பரிமாற்றத்துக்கான செயலிகளை வழங்குகின்றன.
செல்லிடப்பேசி வழியில் ரொக்கமில்லா பரிவர்த்தனைகளை மேற்கொள்ள இதுபோல் பல்வேறு வழிகளும் உள்ளன. புதிதாகக் கேட்கும்போது, புரியாத விஷயமாக இருக்குமோ என்று தயக்கம் தோன்றும். தொடக்கத்தில் கடினமாகத் தோன்றினாலும், இந்த வகை பரிவர்த்தனைகள் எளிமையானவை. பாதுகாப்பானவை கூட!
யூஎஸ்எஸ்டி

பரிவர்த்தனைகளுக்கு நீங்கள் பயன்படுத்தும் செல்லிடப்பேசி எண்ணை வங்கியில் பதிவு செய்ய வேண்டிது அவசியம். அதுதான் முதல் படி.
செல்லிடப்பேசி மூலம் செயல்படும் “யூஎஸ்எஸ்டி’ என்ற பரிமாற்ற சேவையைப் பயன்படுத்த, இணைய வசதி வேண்டும் என்ற அவசியமில்லை.
முதலில், உங்களுடைய செல்லிடப்பேசியில் இருந்து “யி99லி’ எண்ணை அழைக்க வேண்டும்.
பின்னர், உங்களுடைய வங்கியின் சுருக்கமான முதல் 3 எழுத்துகளையோ, கணக்கு வைத்துள்ள வங்கிக் கிளையின் ஐஎஃப்எஸ்சி எண்ணின் முதல் 4 எழுத்துகளையோ, வங்கி எண்ணின் முதல் இரண்டு எழுத்துகளையோ குறிப்பிட வேண்டும். அதன் பின்னர், வங்கிக் கண்டு இருப்புநிலை, மினி ஸ்டேட்மெண்ட், பணம் அனுப்புதல் ஆகிய சேவைகளைப் பெற முடியும். இருப்புநிலையைக் கண்டறியவும் பணம் அனுப்பவும் உங்களுடைய வங்கிக் கணக்கின் கடைசி 4 எண்களை அழுத்த வேண்டும். மொபைல் பின்னைப் பெறுவதற்கு வங்கி அட்டையின் கடைசி 6 எண்கள் மற்றும் தேதி, மாதம் ஆகிய 10 இலக்கங்களை அழுத்த வேண்டும். இந்த “யூஎஸ்எஸ்டி’ சேவையைப் பயன்படுத்தி நமது வங்கிக் கணக்கின்
அனைத்து விவரங்களையும் அறிந்து கொள்ளலாம்.

(தினமணி 26-12-2016)

Posted in Uncategorized | Leave a comment

அரசியல் கூடாது

அண்மைக் காலத்தில் உயர்கல்வி நிலையங்கள் அதிகரித்து வந்தாலும், மறுபக்கம் பல்வேறு முயற்சிகளைச் செய்தும் “அனைவருக்கும் கல்வி’ என்ற இலக்கை நாம் அடைய முடியவில்லை. பள்ளிப் பருவத்திலேயே படிப்பை விட்டு வெளியேறும் மாணவர்களின் எண்ணிக்கையும் குறைந்தபாடில்லை.
தொழில்நுட்ப வசதிகளை குழந்தைகள்கூட சரளமாகப் பயன்படுத்தி வரும் இன்றையச் சூழலில், கல்வித் துறையில் தொழில்நுட்பங்கள் போதுமான அளவில் இன்னமும் நுழையவில்லை. புத்தகச் சுமை உள்ளிட்ட தடங்கல்களால், பெரும்பாலான மாணவர்களுக்கு சுகமான கல்வி அனுபவமும் கிடைக்கவில்லை.
இந்தச் சூழலில்தான், புதிய கல்விக் கொள்கைக்கான வரைவை மத்திய அரசு அண்மையில் கொண்டு வந்தது. அது தொடர்பான கருத்துக்களையும், ஆட்சேபணைகளையும் செப்டம்பர் 15-ஆம் தேதிக்குள் தாக்கல் செய்யுமாறு மத்திய மனிதவள மேம்பாட்டுத் துறை கேட்டுக் கொண்டது.
அந்த அறிக்கைக்கு ஆதரவும், எதிர்ப்பும் சம அளவில் கிளம்பின. எதிர்ப்பவர்களில் பெரும்பாலானோர் அரசியல் காரணங்களை முன்னிட்டே புதிய கல்விக் கொள்கையை எதிர்க்கின்றனர். ஒரு சிலர் மட்டுமே காரணங்களை அடுக்கி, கல்விக் கொள்கையை எதிர்க்கின்றனர்.
ஆனால், வரைவு அறிக்கையைப் படிப்பவர்களுக்கு, அதைத் தயாரித்த டி.எஸ்.ஆர். சுப்பிரமணியம் குழுவின் ஆதங்கம் புரிய வரும். உண்மையில், சுதந்திரம் பெற்று இவ்வளவு ஆண்டுகளாகி விட்டாலும், “அனைவருக்கும் கல்வி’ என்ற இலக்கை அடைய முடியவில்லையே, தேவையான உயர்கல்வி பெறாமல் படிப்பை இடையிலேயே நிறுத்தும் மாணவர்களின் எண்ணிக்கை குறையவில்லையே என்ற ஆதங்கமே இந்த வரைவில் இடம்பெற்றுள்ளது.
எட்டாம் வகுப்பு வரை தேர்வு இல்லாததால், பல பள்ளிகளில் பாடம் நடத்துவதில் தடங்கல் ஏற்படுவதாகக் கூறப்படுகிறது. இதனால், மாணவர்களுக்கு அளிக்கப்பட வேண்டிய கல்வி உரிய காலத்தில் வழங்கப்படாமல் மறுக்கப்படுகிறது.
எனவே, ஐந்தாம் வகுப்பு வரை மட்டுமே தேர்வு கூடாது என்றும், அதற்கு மேல் வகுப்புகளில் படிப்பவர்களுக்கு தேர்வுகள் அவசியம் என்றும் வரைவு அறிக்கையில் கூறப்பட்டுள்ளது.
ஆனால், இந்தப் பரிந்துரையால் அடித்தட்டு மக்களின் கல்வி உரிமை பாதிக்கப்படுவதாக சிலர் விமர்சிக்கின்றனர். இதை விடவும் மோசமாக அந்த மக்களை இழிவுபடுத்தி விட முடியாது.
தரமான கல்வியைப் பெற்றதால், சமூகத்தில் நல்ல நிலையில் முன்னேறியுள்ள அடித்தட்டு மக்களின் எண்ணிக்கை தற்போது அதிகரித்து வருகிறது. அவர்களுக்குத் தேவை தரமான கல்வி மட்டுமே. அது உறுதிப்படுத்தப்பட வேண்டும்.
மேலும், கல்வியை போதிப்பதோடு நின்று விடக் கூடாது. மாறி வரும் வாழ்க்கைச் சூழலுக்கு ஏற்ப எதிர்காலத் தலைமுறையினரை தயார் செய்ய வேண்டியது அவசியம்.
கல்வி மட்டுமின்றி, அவரவருக்கு விருப்பமான துறைகளில் நிபுணத்துவம் பெறுவதற்கும் மாணவர்கள் சுயமாகச் சிந்திப்பதற்கும் ஊக்கமளிக்கும் வகையில் பாடத்திட்டம் அமைய வேண்டும்.
அண்மையில், முக்கிய தகவல் தொழில்நுட்ப நிறுவனம் ஒன்றின் நேர்முகத் தேர்வுக்கு வந்திருந்த 300-க்கும் மேற்பட்டோரில் விரல் விட்டு எண்ணக்கூடிய அளவிலேயே பொறியியல் பட்டதாரிகள் தேர்ச்சி பெற்றதாக ஒருவர் கூறினார்.
இன்றைய கல்விமுறையால் சிறந்த நிபுணர்களை உருவாக்க முடியவில்லை என்பதை இதுபோன்ற நிகழ்வுகள் உணர்த்துகின்றன. இந்நிலை மாற வேண்டும்.
படிப்பை இடையில் நிறுத்தி விட்டு, மளிகைக் கடையில் பொட்டலம் மடிக்கும் சிறுவனால், மனக் கணக்குகளை சரியாகப் போட முடியுமானால், அவனால் பள்ளிப் பாடங்களை ஏன் புரிந்து கொள்ள முடியாது என்பதை ஆய்வு செய்ய வேண்டும்.
அதேபோல், வேத கணிதம் போன்றவற்றால், சாதாரண மாணவர்கள் கணக்குகளை எளிய முறையில் புரிந்து கொள்ள முடியும் என்று கூறப்படுகிறது. அத்தகைய முறைகளை கல்வித் திட்டத்தில் ஏன் புகுத்தக் கூடாது? மாணவர்களை மேம்படுத்தும் வகையில் கல்வி அமைய வேண்டும்.
மாறி வரும் சூழலுக்கேற்ப ஆசிரியர்களும் தங்களைத் தகவமைத்துக் கொள்வது அவசியம். அவர்களுக்கு ஐந்தாண்டுகளுக்கு ஒருமுறை தகுதித் தேர்வுகளை நடத்துவது, அவர்களது திறமைகளை மேலும் மெருகூட்டுமே தவிர குறைத்துவிடாது.
அடுத்து, தேசிய கல்விக் கொள்கையால் மாநிலங்களின் உரிமைகள் பறிக்கப்படுவதாகக் கூறப்படுகிறது. உண்மையில், கல்வி சார்ந்த உள்ளூர் பிரச்னைகளைக் களைவதற்கு மாநில அரசுகள் திட்டங்களை வகுக்க வேண்டும் என்றுதான் புதிய கல்விக் கொள்கை கூறுகிறது.
அனைவருக்கும் கல்வியை அளிப்பதில் மாநில அரசுகளுக்கு உள்ள பொறுப்புகளையும் சுட்டிக்காட்டுகிறது. சமூக அறிவியல் பாடத்திட்டத்தைத் தயாரிப்பது, கல்விக்கான நிதி ஒதுக்கீடு ஆகியவற்றில் மத்திய – மாநில அரசுகள் இணைந்து செயல்பட வேண்டும் என்று வலியுறுத்துகிறது.
மேலும், கல்வியளிப்பதில் நிலவும் ஏற்றத்தாழ்வு, அடித்தட்டு மாணவர்களுக்கு உயர்கல்வி அளிப்பது ஆகியவற்றையும் பேசுகிறது. தாய் மொழிக் கல்விக்கு முன்னுரிமை அளிக்கப்படுவதோடு, பிற இந்திய மொழிகளைக் கற்பதற்கும் வாய்ப்பளிக்கப்பட வேண்டும் என்று கூறுகிறது.
மாறி வரும் சூழலுக்கு ஏற்பவே புதிய கல்விக் கொள்கை தயாரிக்கப்பட்டுள்ளது. இந்தியா போன்ற பரந்த தேசத்தில் ஒரே
விதமான கல்வி முறையைப் புகுத்துவது எளிதல்ல. எனவே, புதிய கல்விக் கொள்கையில் சில மாறுபட்ட கருத்துகளும் எழக்கூடும்.
அவை ஆளும்கட்சி மீதான கோபத்தை வெளிப்படுத்துவதாக அமைந்துவிடக் கூடாது.
கல்வி என்பது அரசியலுக்கான களமல்ல; எதிர்கால இந்தியாவின் வாழ்க்கை என்பதை புதிய கல்விக் கொள்கை எதிர்ப்பாளர்கள் புரிந்து கொள்ள வேண்டும்.

 

(தினமணி 19-09-2016)

Posted in Uncategorized | Leave a comment

இதிலுமா அரசியல்?

பழைய ரூபாய் நோட்டுகள் செல்லாது என்று அறிவித்த நேரத்தில், எங்கள் வீட்டில் ஒரு திருமண நிகழ்ச்சிக்குத் திட்டமிட்டிருந்தோம். அனைவருமே இந்த நடவடிக்கையை ஆதரித்தாலும், நடைமுறை சிக்கல்கள் இருக்கவே செய்தன.
வங்கிகள் செயல்படத் தொடங்கியதும் வீட்டிலிருக்கும் அனைவரும் முடிந்த அளவு பணத்தை எடுத்தோம். பல இடங்களில் வங்கி அட்டைகளை ஏற்று கொண்டனர். திட்டமிட்டு செயல்பட்டதால், குழப்பங்கள் எதுவும் நிகழவில்லை. எனது சொந்த அனுபவம் இது.
வரலாற்றில் முதல் முறையாக மத்திய அரசு எடுத்துள்ள திடீர் நடவடிக்கை, இதேபோல் பலரது அன்றாட செலவுகளை நிச்சயம் பாதித்திருக்கும் என்பதில் சந்தேகமில்லை.
எரிவாயு நிலையங்களிலும் மருத்துவமனைகளிலும் மட்டும் ரூபாய் நோட்டுகள் செல்லும் என்று அறிவிக்கப்பட்டதால், பல இடங்களில் குழப்பம் ஏற்பட்டது. வங்கிகளிலும், தானியங்கி மையங்களிலும் வரிசைகள் அதிகரித்தன. பல தொழில்கள் தாற்காலிகமாக முடங்கின.
போதாததற்கு வதந்திகளும் ஏராளமாகப் பரவின. சாமானிய மக்கள், மாதாந்திர சம்பளதாரர்கள் போன்றோரின் நிலை சொல்லித் தெரிய வேண்டியதில்லை.
இந்தப் பாதிப்புகளையும் மீறி மத்திய அரசின் நடவடிக்கைக்கு ஆதரவுகள் பெருகி வருகின்றன. கருப்புப் பணத்தையும், கள்ள நோட்டுகளையும் ஒழிக்க வேண்டும் என்று பல ஆண்டுகளாக பேசி வருகிறோம்.
சில ஆண்டுகளுக்கு முன்னர், கள்ள நோட்டுகள் பற்றிய அச்சத்தால், 500 ரூபாய் நோட்டுகளை பலர் வாங்க மறுத்தது, நினைவிருக்கலாம். அதற்காக பல்வேறு நடவடிக்கைகளை மேற்கொண்டாலும், கள்ள நோட்டு நடமாட்டத்தை நிறுத்த முடியவில்லை.
இந்நிலையில், உடனடியாகவும் துணிச்சலாகவும் நடவடிக்கை எடுக்க வேண்டும் என்று பலரும் விரும்புகின்றனர். அதைதான் மோடி மத்திய அரசு செய்துள்ளது என்று அவர்கள் நினைக்கின்றனர்.
அதேபோல், கணிசமான சிலர் இந்த நடவடிக்கையை எதிர்க்கின்றனர். கருப்புப் பணத்தை ஒழிப்பது நடைமுறை சாத்தியமற்றது என்பது அவர்களின் கருத்து.
பிரதமரின் நடவடிக்கையை பா.ஜ.க. மட்டுமல்ல, நிதீஷ் குமார் போன்ற எதிர்க்கட்சித் தலைவர்களும் ஆதரிக்கின்றனர்.
எதிர்பார்த்ததைப்போல், காங்கிரஸ், இடதுசாரிகள், சமாஜவாதி கட்சி ஆகியவை எதிர்க்கின்றன. மோடி எதிர்ப்பாளர்களுக்கோ, வழக்கம் போல மோடியைத் திட்டுவதற்கு மீண்டும் ஒரு வாய்ப்பு, அவ்வளவே.
மத்திய அரசின் நடவடிக்கையில் சில குறைகள் இருக்கலாம். அவற்றை விமர்சிப்பது நியாயமானதும்கூட. ஆனால், எதிர்க்கட்சிகளோ அரசைக் குறை கூறுவதில் மட்டுமே முனைப்பு காட்டுகின்றன.
சமூக வலைதளங்களிலும், பொது அரங்குகளிலும் கடுமையாக விமர்சித்து மக்களிடம் அவநம்பிக்கையை உருவாக்கியதோடு, அரசுக்கு ஒத்துழைப்பு அளிக்கவும் மறுத்தன.
கருப்புப் பணமும் கள்ள நோட்டுகளும் நாட்டின் பல்வேறு தளங்களில் பரவியுள்ளது. இந்நிலையில், முன்கூட்டியே தகவல் கொடுத்து விட்டு, அதிரடி நடவடிக்கையை எடுத்திருத்திருக்கலாம் என்று எதிர்க்கட்சிகள் வாதிடுகின்றன.
அவகாசம் கொடுத்திருந்தால், கருப்புப் பணக்காரர்கள் தப்பிக்க வாய்ப்புண்டு என்பதே நிதர்சனம்.
காங்கிரஸ் ஆட்சியில் இருந்த காலத்தில்தான் மன்னர் ஆட்சி முறையும், ஜமீந்தார் முறையும் ஒழிக்கப்பட்டன. வங்கிகள் தேசியமயமாக்கப்பட்டன. அவற்றால் மக்களுக்கு அதிக பலன்கள் கிடைத்தாலும் சிலருக்கு பாதிப்புகள் ஏற்படவே செய்தது. அதனால், அந்தச் சீர்திருத்தங்களைக் குறை கூற முடியுமா?
அரசியல் காரணங்களுக்காக அவசரநிலையை இந்திரா காந்தி கொண்டு வந்தாலும், அந்தக் காலக்கட்டத்தில் ஏற்பட்ட சில நன்மைகளை இன்னும் காங்கிரஸ்காரர்கள் பிரசாரம் செய்யத் தவறுவதில்லையே?
உச்சகட்டமாக, அக்கட்சியின் துணைத் தலைவர் ராகுல் காந்தி வரிசையில் நின்று ரூபாய் நோட்டுகளை மாற்றினார். சாதாரண உள்ளூர் அரசியல்வாதியே கோடிகளில் புரளும் உண்மை அனைவருக்கும் தெரியும்.
அப்படியிருக்க, சில தலைமுறைகளாக ஆட்சிப் பொறுப்பில் அமர்ந்து வரும் நேரு குடும்பத்தைச் சேர்ந்தவர், வெறும் ரூ.4,000 மட்டுமா வைத்திருப்பார் என்று மக்கள் நகைப்புடன்தான் பார்த்தனர்.
கேரளத்தில் ஈ.எம்.எஸ்.நம்பூதிரிபாட் ஆட்சியின்போது நில சீர்திருத்தச் சட்டம் கொண்டு வரப்பட்டது. ஆனால், அந்தத் திட்டத்தை அமல்படுத்தியதால், நம்பூதிரிகள் பட்ட துன்பங்கள் ஏராளம். அதற்காக, அந்த திட்டத்தைத் தவறு என்று சொல்லிவிட முடியுமா?
சிங்கப்பூரில் முன்னாள் அதிபர் லீ குவான் யூ அந்நாட்டைத் தூய்மைப்படுத்த கடுமையான நடவடிக்கைகளைக் கொண்டு வந்தார். முதலில் அதற்கு எதிர்ப்புகள் வந்தாலும், பின்னர் அதற்கு மக்கள் ஒத்துழைத்தனர்.
அமெரிக்காவில் இரட்டை கோபுரத்தை பயங்கரவாதிகள் தகர்த்தபோது, ஆளுங்கட்சியும் எதிர்க்கட்சியும் இணைந்து செயல்பட்டன. ஆளுங்கட்சியைக் குறை கூறி கொண்டிருக்கவில்லை. இரண்டாம் உலகப் போர் நேரத்தில் ராணுவ வீரர்கள் முட்டை சாப்பிட ஒத்துழையுங்கள் என்று சர்ச்சில் கேட்டுக் கொண்டதை அடுத்து, அந்நாட்டு மக்கள் வரிசையில் நின்று முட்டைகளைத் திருப்பியளித்தனராம்.
எதற்கெல்லாமோ வெளிநாட்டவரைப் பின்பற்றும் நாம், அரசியல் நாகரிகத்தில் அவர்களை ஏன் பின்பற்றக் கூடாது?
மக்களுக்கு சேவை புரியும் பொறுப்பு ஆளுங்கட்சிக்கு மட்டுமல்ல; எதிர்க்கட்சிகளுக்கும் உண்டு. அரசின் திட்டங்களை விமர்சிப்பதோடு, ஆளுங்கட்சி செய்யத் தவறிய கடமைகளை சுட்டிக்காட்டும் பொறுப்பும் எதிர்க்கட்சிகளுக்கு உண்டு.
மக்களிடத்தில் நம்பிக்கையை ஏற்படுத்தும் வாய்ப்பை எதிர்க்கட்சிகள் தவற விட்டு விட்டன.

(தினமணி 29-11-2016)

Posted in Uncategorized | Leave a comment